游蕙禎手臂紋梵文 提自己「勇敢」

青年新政候任立法會議員游蕙禎（游BB）尋日身穿黑色背心連身裙，出席立法會秘書處為新丁議員安排嘅簡介會，游BB固然「省鏡」，但佢左手手臂內側嘅神秘紋身就更加搶眼，佢好可能係本港首位有紋身嘅女立法會議員。游BB話，手臂紋身係今年一月先紋上去，目的係提醒自己「性格上好啲」。到底「女神」覺得自己性格上有何缺陷？佢話紋身係想提醒自己遇到認為啱嘅事時，就唔好膽怯。                                                                                                


游蕙禎左手手臂現梵文紋身，有網民話係解作勇敢。（葉華英攝）

身上唔只一個紋身
                                                                                                游BB被發現手臂有紋身時，表現得相當靦覥，被問到紋身符號點解，佢就話︰「呢啲嘢都係留番畀自己啦！」只肯透露紋身係梵文，又話雖然紋身好痛，但又不至於「痛到喊」，仲透露身上有多於一個紋身。咁紋喺邊個部位呢？佢就唔肯講喇，充滿神秘感。不過，廣大網民好快就搵到神秘紋身嘅解釋，有人話佢紋嘅係梵文（Sanskrit），意思係勇敢，但係咪解作「勇武」呢？亦有人話有祝福嘅意思。翻查網上資料，該字用喺形容詞可解作穩定、不變、堅定、果斷、勇敢、莊重、有教養、沉穩、精力充沛等；而名詞可解作海洋或大海。                                                                                                


對於可能成為本港首位有紋身嘅女立，游BB就話唔會因為做咗議員而洗去紋身，亦唔會特意唔着背心迴避。                                                                                                


資料來源: 東方日報